Lang kreyòl, yon zouti rezistans pou pèp Ayisyen, dapre Akademi Kreyòl Ayisyen (AKA)

Getting your Trinity Audio player ready...

Akademi Kreyòl Ayisyen an (AKA) fèmen mwa lang ak kilti Kreyòl la anba tèm : « Lang kreyòl, zouti rezistans pèp ayisyen », mete aksan sou enpòtans lang nan kòm yon pilye nan rezistans ak idantite ayisyèn.

Port-au-Prince, 29 oktòb 2024 – Akademi Kreyòl Ayisyen an (AKA) selebre jounen lang ak kilti Kreyòl la nan yon anbyans rich ak aktivite fòlklòrik, pwovèb ak dans kreyòl. An prezans plizyè pèsonalite, tankou rektè Inivèsite Leta DAyiti a, Fritz Deshommes, AKA mete aksan sou lang kreyòl la kòm yon zouti fondamantal pou rezistans pèp ayisyen an.

Nan seremoni an, sekretè egzekitif AKA, Samuel Jean Baptiste, renouvle angajman li pou fè pwomosyon lang kreyòl la. Li soulve reyalite difisil peyi a ap travèse, kote anpil moun oblije kite lakay yo anba menas gang ki kontwole divès zòn. « Lang kreyòl la se plis pase yon mwayen kominikasyon; se yon zouti rezistans ki ranfòse idantite nasyonal la, » li deklare.

Rektè Fritz Deshommes salye travay AKA ap fè, malgre pèt plizyè manm nan kominote a, kèk ki kouri kite peyi a akòz klima ensekirite a. « Akademi Kreyòl la ap kontinye reziste ak fòs, » selon Fritz Deshommes, l ap mete aksan sou kontribisyon AKA nan defann lang kreyòl la.

Avansman fèt nan lang kreyòl la ak ansèyman li nan nivo 9yèm ane fondamantal, ansanm ak pwodiksyon liv nan lang sa a gras a Ministè Edikasyon Nasyonal ak Fòmasyon Pwofesyonèl. Kesyon an rete sou si kreyòl la pa ta dwe anseye kòm lang matènèl nan nivo ki pi ba yo tou?

Came Stefada Poulard
Vant Bèf Info (VBI)